HomelandMedia.net

Warar Sugan Kala Soco Daafaha Dunida

 

 

 Nabadoono iyo waxgarad bayaan ka soo saaray Xaalada Puntland (Bayaan).

26.Dec.2012.Homelandmedia.Net.Xili ay xaaladda siyaasadeed ee Puntland sii xumaaneyso islamarkana la isku heysto muddo kororsi uu doonayo madaxweynaha Maamul goboleedka Puntland C/raxmaan Faroole siyaasiyiin badana diidan yihiin.
Bayaanka ayaa kasoo baxay waxgarad iyo nabadoono kulan wadtashi ah ku yeeshay magaalada Garowe wxuuna u qornaa baaqa kasoo baxay sidan soo socota.
Bismillahi Raxmaani Raxiim
Ku: Isimmada Puntland
Ku: Xukuumadda Puntland
Ku: WGXGQM: Mahiga
Ku: Midowga Afrika
Ku: Golaha Ammaanka ee QM
Ku: Jaamacadda Carabta
Ku: IGAD
Og: JFS, Fadhiyadooda
Garoowe
Muqdisho
Addis Ababa
New York
Cairo
Djibouti
Muqdisho
Ujeeddo: Baaq ku socda Isimmada Puntland
Puntland waxa dul hoganaya daruur madoow iyo jahwareer siyaasadeed taasoo aan la hubin halka ay biya-dhigi doonto, haddii aan xal degdeg ah loo helinna, si ba’an u majaxaabin karta horumarka, nabadda, wadajirka iyo xasilloonida ay ku caan baxday iyo kaalinteeda hoggaamineed ee Soomaaliya.  Iyada oo ay maalmo kooban inaga xigaan xilligii dastuuriga ahaa ee loo asteeyay doorashada madaxweynenimo ee Puntland (8-da January) ayay rajada ay ku qabsoomi karto aad u yartahay. Waxa mar horeba dhammaaday sharciyaddii iyo jiritaankii golaha wakiillada.
Maamulka Puntland ee uu xilliga ka dhammaanayo ayaa si aan dastuurka iyo mucaahadadii lagu dhisay Puntland waafaqsanayn ku tallaabsaday muddo kororsi sharci-darro ah isaga oo ku saleeynaya go’aankiisa doodo aan sharci ahayn.
Iyada oo la dhowrayo sharciga iyo kala-dambaynta, isla markaana looga fogaado faraaq maamul iyo mid siyaasi, ayay dhaq-dhaqaayaal ka soo jeeda qaybaha kala duwan ee dadka Puntland bilaabeen in ay xukuumadda ku cadaadiyaan in doorashadii madaxweynenimo ku qabato muddada kooban ee ka hartay sharciyaddeedda.  Iyada oo taa laga duulayo ayaa wufuud ka kala yimid gobbollada Bari, Karkaar iyo Mudug isugu tageen Garoowe, fadhiga xukuumadda.
Hadafka socdaalku waxa uu ahaa in marxaladdan kala-bayrka ah Puntland lagu gudbiyo si nabad ah loona ilaaliyo xasilloonida, si taas loo gaarana xukuumadda culays lagu saaro in ay u hoggaansato dastuurka iyo rabitaanka dadka.  Dastuurka Puntland waxa uu si cad oo banneeynayaa una difaacayaa xuquuqda cabiridda ra’yiga, kulannada, isku soo bixidda iyo waliba socdaalka muwaadiniinta.
Ayaan-darro maamulka Puntland waxa uu ku tilmaamay muwaadiniintii xaq doonka ahaa fidna wadayaal.  Qaar waxa uu ka celiyay xudduuddaha Garowe, qaar waxa uu ka mamnuucay in ay kulmaan, qaar wuu tarxiilay, qaarna waaba uu xirxiray.  Waxa kale oo xusid mudan sumcad xumana ku ah sharciga iyo sharafka Puntland in maamulka uu jirdilay qaar ka mida ergooyinka.  Xadgudubyada lagula kacay ergooyinka waxa ka mida:
Talaadadii 18-kii December, abbaare 11-kii habeeynimo waxa Hotel Alxaramayn laga kaxaystay shan oday oo ka mida ergadii gobolka Bari iyada oo saldhigga dhexe ee Garoowe lagu waydiiyay su’aalo ku saabsan safarkooda, laguna amray in ay isaga baxaan magaalada.
Arbacadii 19-kii December, 11-kii barqanimo, waxa kantarooka Bari ee Garoowe muddo saddex saac ah lagu xayiray odayaal ka tirsan ergadii gobolka Bari,  halka Kantaroolka Koonfureed ee Garowe-na muddo saacad ka badan lagu xayiray ergadii gobolka Mudug, iyada oo si ixtiraam darro ah loo baaray agabkoodii iyo bedenkoodii, looguna hanjabay  in ay xarig iyo jirdil mudan doonaan.
Galabnimadii Sabtida 22-kii December, casarkii ayaa waxa magaalada bartankeeda laga xiray Cabdikaafi Xasan Maxamed ku-xigeenka Hay’adda Daryeelka Bulshada iyada oo rasaas lagu argagixiyay ka hor qabashadiisii qof kalena lala xira.
Ciidan bilays ah oo uu wato Taliyaha Qaybta Gobolka Nugaal, oo aan wadan wax waaran maxkamadeed ah, ayaa hoteelka Mashallaha kala-baxay Nabadoon Yaasiin Cabdisamad.
Fiidkii ayaa waxa sarkaal ka socda nabadsugidda uu Hoteelka ka kaxeeyay Abdirisaaq Burgal, wuxuuna u sheegay in uu doonayo Wasiir ku-xigeenka Amniga iyo Taliyo ku-xigeenka Bilayska.  Waxay ku handadeen in uu yahay maal-galiyaha ergada, waxayna ku amreen in uunan shir qaban karin. aroortana isaga baxo magaalada.
Sidoo kale, labadaasi mas’uul waxay u yeereen oo intoo kale ku handadeen saddex ergay oo ka tirsanaa gobalka Bari.
Axaddii 23-kii December, waxa la xiray Axmed Maxamed
Axaddii habeeynimadii waxa kantaroolka Bari lagu xayiray, laguna handaday, dabadeedna inta gaadiidkii awood looga qaaday qaar ka mida ergada gobolka Bari.  Waxa la geeyay Dangorayo. Qaar ayaa jir dil loo gaystay, waxana lagu dabiibayaa isbitaalka Qardho
Isniintii 23-kii December, waxa hotteellada loogu tagay dhammaan ergooyinka waxana lagu amray in ay isaga baxaan magaalada inta uunan gabbalku dhincin, haddii kale wixii ku yimaada ay iyagu mas’uul ka yihiin.
Nasiib-darro waxa noo caddaatay in maamulku ay ka go’antahay ku tumashada dastuurka, balse taa baddalkeeda uu qaadayo tallaabooyin xaaladda uga sii dari kara.
Haddaba annaga oo arrimahaas oo dhan tix-galinayna, isla markaana wali u hiillinayna maslaxadda guud iyo aayaha dadka iyo dhulka Puntland ayaan waxan dhinacyada uu qoraalkani khuseeyo u soo jeedinaynaa baaqan:
In la ilaaliyo sharciga iyo dastuurka Puntland ee heshiiska lagu yahay lagana fogaado isku dayada lagu muquuninayo xuquuqda madaniga ah ee dadweynaha Puntland isla markaana si degdeg ah oo aan shuruudi ku xirnayn xoriyaddoodii loogu soo celiyo muwaadiniinta la xiray, qaadacaadda iyo culayskana laga dul qaaddo kuwa laga xarrimay xuquuqdoodii dastuuriga ahayd.
In Sharciyadda xukuumadda Puntland uu ku egtahay 8da January 2013.
Waxan si cad ugu baaqaynaa in Isimmada Puntland ee ah marjaca dadka iyo dhulka ay soo fara-galiyaan arrinka jihana u bixiyaan duruufaha siyaasadeed ee qallafsan ee la soo darsay kayaanka
In wax walba laga horumariyo ilaalinta iyo joogtaynta nabadda iyo maslaxadda Puntland dad iyo dhulba taas oo lagu gaari karo in la dhawro sharciga iyo dastuurka Puntland.
In xukuumadda ay ka faa’idaysato waqtiga yar ee u haray kuna dadaasho in ayan dadka iyo dhulka badin faraaq siyaasadeed iyo mid maamul, garawsato rabitaanka dadka, ka jawaabto, si degdeg ahna ugu dhiirrato tallabo walba oo looga maagan karo faraaqaas iyo burburka daba oolli kara.
Ugu dambayntii waxan ku rajo waynahay in uu caqliga suuban talin doono oo ay Isimada Puntland oo gacan ka helaya dhammaan saamileeyda iyo daneeyayaasha arrimaha Puntland ay mayalka u qabtaan xaaladda, kana hortagaan fursad walba oo ay arrimuhu uga sii dari karaan, ceeb, fuul-xumo, dhibaato iyo eel la soo darsa dadka iyo dhulka Puntland kaas oo saamayn doona dhammaan qaybaha bulshada, si gaar ahna uu taaban doona nugulka dadkeenna.
Wabillaahi Towfiiq.
Guddiga Ergada Puntland
Inj. Cabdicaziz Boqor Muse
Samadoon Maxamud Xasan Diric
Cabdullahi Maxamed Barre
Nabadoon Axmed Siciid Firdhiye
Nabadoon Maxamed Aden Yusuf
Nabadoon Siciid Haji Ciise
Nabadoon Sahal Cabdisalan Yusuf
Nabadoon Haji Siciid Islan
Amir Cali Farax Xirsi
Nabadoon Cabdi Maxamud Ugas
Cabdikarim Salax Cabdi
Nabadoon Cabdi Buraale
Nabadoon Maxamed Maax Colow
Nabadoon Siciid Ciise Hindi
Nabadoon Nuur Farax Faqey
Nabadoon Cali Aden Ciise
Nabadoon Siciid Cisman Weyrax
Nabadoon Cisman Maxamed Maxamud
Nabadoon Ladane Nuur Xasan
Nabdoon Cumar Nuur Cisman
Dr. Abdulqadir Shoole
Nabadoon Maxamud Qordheeer
Nabadoon Cabdullaahi Maxamed Muuse (Kadiido)
Nabadoon Cabdi Saciid Warsame
Nabadoon Cabdiqani Maxamed (baalle)
Nabadoon Cabdirashiid Mursal Faarax
Nabadoon Cabdullahi Xasan Joorj
Nabadoon Feysal Sahal Shuceyb
Ing. Cabdirisaaq Burgal Xaaji
Axmed Cumar Cali(Qurbajoog)
Axmed Khalif
Saciid Cabdi Firin.

Homelandmedia.net

Homelandmedia@hotmail.com

 Homelandmedia.net Warbaahin laga xigto dunida dacaladeeda meel kasta oo aad ka joogto, kala soco wararkii iyo dhacdooyinkii ugu danbeeyey ee Soomaaliya iyo Caalamka intiisa kale

 

 

 

 

 

HOMELANDMEDIA.NET - - - EMAIL:
© Copyright RealWeb Enterprises Ltd.all rights reserved.